О́ńirlerge sapar aıasynda Parlament Senaty Konstıtýsııalyq zańnama, sot júıesi jáne quqyq qorǵaý organdary komıtetiniń tóraǵasy Georgıı Kım elimizdiń Memlekettik qyzmet isteri jáne sybaılas jemqorlyqqa qarsy is-qımyl jónindegi agenttigi Qaraǵandy oblystyq departamentiniń basshylyǵymen jáne qyzmetkerlerimen kezdesti.
Senator kezdesý barysynda departament jumysynyń negizgi baǵyttarymen tanysty jáne Prezıdenttiń bes bastamasyn iske asyrý qajettigin jan-jaqty túsindirdi. Atap aıtqanda, depýtat Memleket basshysynyń usynystaryn iske asyrý jáne ilgeriletý jónindegi arnaıy jospar ázirleıtin arnaıy top qurýdy usyndy. Bul josparda memlekettik qyzmetshilerdiń jumys isteýine jaǵdaı jasaý jáne Elbasynyń tapsyrmalaryn kidirtýge jáne sapasyz oryndalýyna jol bermeý jónindegi eki másele qamtylýy tıis ekendigi aıtyldy. Depýtat Qaraǵandy oblystyq sotynyń ujymymen de kezdesti.
* * *
Senattyń Ekonomıkalyq saıasat, ınnovasııalyq damý jáne kásipkerlik komıtetiniń hatshysy Sársenbaı Eńsegenov Atyraý oblysy, Inder aýdanynyń Jarsýat aýyldyq okrýginde jáne Qurylys aýylynda jergilikti turǵyndarmen bolǵan kezdesýlerde bes áleýmettik bastamanyń basty baǵyttaryn jan-jaqty túsindirip berdi.
Jıynda turǵyn úı satyp alýǵa arnalǵan nesıeniń erekshelikteri, eńbekaqysy tómen adamdarǵa salyqty azaıtý, shaǵyn kásipkerlikti óristetý úshin jeńildikpen beriletin nesıe sharttary týraly áńgime órbidi.
Aımaqtaǵy kezdesýlerge aýdan ákimderi men aýdandyq máslıhattardyń hatshylary da qatysty.
* * *
Aqtóbe oblysyndaǵy Qarǵaly aýdanynyń turǵyndarymen kezdesýde senator Muhtar Jumaǵazıev Memleket basshysynyń bes bastamasy aýyl turǵyndary úshin jańa múmkindikter beretindigin baıandady. Depýtat Úndeýdegi úı satyp alýǵa beriletin jańa múmkindikter, bilim alýdyń sapasyn arttyrý jáne salyq aýyrtpalyǵyn tómendetý máselelerine jan-jaqty toqtaldy. Al aýyl turǵyndary kezdesý barysynda zeınetaqynyń jańa júıesin engizýge, aýyldyq jerlerge jas mamandardy turaqtandyrý maqsatynda jalǵa beriletin turǵyn úı qurylysyna qatysty saýaldar qoıdy.
M.Jumaǵazıev osy aýdandaǵy Qosestek aýylynda bolyp, jergilikti turǵyndardan sút satyp alatyn «Qosestek» aýylsharýashylyq kooperatıviniń jumysymen tanysty. Kásiporynnyń 4 tonna sút qabyldaýǵa áleýeti jetetin beketi, sút tasýshy kóligi, jalpy sany 87 iri qara maly bar. Olar aýyldyq jerde kásipkerlikti tabysty júrgizip keledi. Daıyn ónim Aqtóbe qalasynyń bazarlaryna jetkiziledi.
Senator Muhtar Jumaǵazıevtiń jumys sapary Muǵaljar aýdanynda jalǵasyp, bul jerde de birqatar kezdesýler ótkizdi.
* * *
Senator Manap Kóbenovtiń Pavlodardaǵy kezdesýleriniń birine dárigerler shaqyryldy. Atalǵan basqosýda Ertisti jaǵalaı qonystanǵan aýyl-aımaqta qaterli isiktiń órship turǵandyǵy aıtyldy. Sol sebepti depýtat Pavlodarda onkologııalyq aýrýhana salýdyń mańyzdylyǵyna toqtaldy.
Senator barlyq mańyzdy máseleler men usynystardy Densaýlyq saqtaý mınıstrligine jetkizetinin jáne Prezıdenttiń bes áleýmettik bastamasy tikeleı halyqtyń ál-aýqatyn jaqsartýǵa qatysty ekendigin baıandady.
* * *
Oral qalasyndaǵy munaı-gaz jáne salalyq tehnologııalar kolledjindegi 2100 stýdenttiń 1400-i memlekettik grant negizinde oqyp jatqanymen, jastardyń birshamasy páter jaǵalap júr. Atalǵan oqý ornynda kezdesý uıymdastyrǵan senatorlar Erbolat Muqaev pen Narıman Tóreǵalıev endi bul qıynshylyqtardyń Elbasy bastamalarynyń negizinde óz sheshimin tabatynyn aıtty.
Depýtattar elimiz tórtinshi ónerkásiptik revolıýsııa aıasyndaǵy mindetterdi júzege asyrýy úshin bilikti mamandar qajet ekenin eske sala kelip, memleket tarapynan kóptegen granttar berilýi jastardyń qalaǵan mamandyqtaryn ıgerýge jol ashatynyn aıtty.
* * *
Jańaózen qalasyna jumys saparymen barǵan Májilis depýtattary Taras Hıtýov, Irına Ýnjakova, Gennadıı Shıpovskıh, Baqytgúl Hamenova «Janarys» JShS ujymymen kezdesip, onyń jumysymen tanysty. Kezdesý barysynda depýtattar Elbasynyń bes áleýmettik bastamasyn jan-jaqty túsindirip, ujym músheleriniń suraqtaryna jaýap berdi. Ýaqytynda dúrkiregen Jańaózen tigin fabrıkasy 1996 jyly «Janarys» JShS bolyp qaıta qurylyp, búgingi tańda 600-ge jýyq adamdy jumyspen qamtyp otyr. «Janarys» tigin fabrıkasynyń arnaýly jumys kıimderine munaıshylar, qurylysshylar, kommýnaldyq jáne medısına salasynda qyzmet kórsetýshiler arasynda joǵary suranysqa ıe bolyp otyr.
* * *
Al Májilis depýtattary Irına Aronova, Baqytjan Ertaev, Gúlnar Bıjanova, Nurlan Ábdirov, Albert Raý jáne Arman Qojahmetov Qostanaı oblysyndaǵy jumys saparynyń sheńberinde elimizdiń eń iri ónerkásip oryndarynyń biri «Sokolov-Sarybaı ken baıytý óndiristik birlestigi» AQ quramyna kiretin Qashar ken basqarmasynda boldy. Atalǵan ken ornynda jylyna 14 mln tonna rýda óndiriledi. Jumysshylardyń ortasha aılyq eńbekaqylary 190 myń teńgege jetken.
Munan soń Májilis depýtattary Rýdnyı ındýstrııalyq ınstıtýtynyń stýdentterimen jáne professorlyq-oqytýshylar quramymen júzdesip, Rýdnyı qalalyq aýrýhanasynyń zamanaýı medısına quraldarymen jabdyqtalǵan hırýrgııalyq, reanımasııalyq jáne rentgenologııalyq bólimderin aralap kórdi.
О́z kezeginde medısına salasynyń qyzmetkerleri Elbasynyń áleýmettik bastamalaryn erekshe qabyldaǵandaryn jáne bul bastamalardyń kenshiler qalasy turǵyndarynyń turmystaryna oń áser tıgizetinine senimdilikterin bildirdi.
* * *
Májilis depýtaty Roman Kım Jambyl oblysyndaǵy sapary barysynda Jambyl oblysynyń ákimi Asqar Myrzahmetovpen jáne oblystaǵy etnomádenı birlestikterdiń jetekshilerimen, oblystyq Qazaqstan halqy Assambleıasy ókilderimen, Qazaqstannyń koreıler qaýymdastyǵy múshelerimen, Taraz memlekettik ýnıversıtetiniń professorlyq-oqytýshylyq quramymen kezdesti.
Sondaı-aq Jambyl oblysyndaǵy is-sharalar barysynda eldegi veterınarlyq-sanıtarlyq qaýipsizdik salasyndaǵy problemalyq máseleler kóterildi.
* * *
Májilis depýtattary Darhan Myńbaı, Balaıym Kesebaeva, Fahrıddın Qarataev, Amangeldi Dáýrenbaev, Abzal Eralıev jáne Natalıa Jumadildaeva Syr óńirindegi jumys sapary barysynda Shıeli aýdanyndaǵy birqatar áleýmettik nysandardy aralady.
Halyq qalaýlylary aldymen «Móldir ı K» seriktestiginiń qus sharýashylyǵy jumysymen tanysty. Bul sharýashylyq 2016 jyly ashylǵan. Oǵan 165 mln teńge kóleminde ınvestısııa salynǵan. Búginde qus fermasy táýligine 20 myń dana jumyrtqa óndirip, óńir turǵyndaryn qamtamasyz etip otyr.
Jalpy, jumys sapary barysynda halyq qalaýlylary jumysshylar tarapynan qoıylǵan saýaldarǵa jaýap berdi.
